موضوع قنبلة خش وشوف وقولى رأيك

[color=red]

السلام عليكم ورحمة الله وبركاته

ده مشهد بيصور شاب راح يتقدم للبنت اللى بيحبها
تعالو بقى نشوف ايه اللى هيحصل وايه اللى هيتقال




الأب : منورنا والله يا استاذ حسن
حسن : ده نورك يا عمى
الاب : فين الشاى يا ام احلام
ام احلام من بعيد : جاية اهه يا ابو احلام

الاب : ها يا ابنى .. ح تدفع كام وتشيل
حسن : اللى تأمر بيه يا عمى
الاب : الامر لله يا ابنى .. احنا مش طالبين كتير .. شقة تمليك فى اى حتة
تكون نضيفة .. ومهر 25 الف جنية يا دوب ده احنا ح نحط ادهم مرتين علشان
نجيب العفش وانت ح تجيب الاجهزة والسجاد وحاجة المطبخ والستاير والذى
منه .. وح تجيب شبكة بزيهم .. طبعا انت عارف ان الدهب غلى يعنى مش ح
يجيبوا حاجة بس انت وذوقك بقى .. مش كده والا ايه يا ام احلام
ام احلام : آه يا أخويا دى عفاف بنت خالتها خطيبها جايبلها شبكة بخمسين
الف جنية .. ده غير الاجهزة الحديثة اللى جايبهالها معاه وهو جاى من
السفر
الاب : اما الفرح فى قاعة صغيرة بس طبعا لازم تساع الحبايب واحنا حبايبنا
كتير .. والقايمة والمؤخر طبعا انت سيد العارفين .. وفى الاول والآخريا
ابنى .. احنا بنشترى رجالة
حسن : بس يا عمى انا ممعاييش المبالغ اللى حضرتك بتتكلم فيها دى
الاب : اللى ممعهوش مايلزموش يا ابنى .. واحنا فى الاول والآخر بنأمن
لبنتنا حياة سعيدة .. امال عايز تاخدها رخيصة والا ايه؟
حسن : يا عمى لو بنتك رخيصة ما كنتش خبطت على بابكم .. وسكك الغلط فى الزمن ده مفيش أسهل منها .. واكتر م الهم ع القلب .. وبعدين احنا ممكن نلم
الدور .. وحضرتك عارف ظروف الحياة اللى بنعيشها .. وانت لسه قايل بعضمة
لسانك ان كل حاجة غليت .. والظاهر ان الانسان بس هو اللى عمال بيرخص
الاب : قصدك ايه؟
حسن : قصدى يعنى دبلتين .. وشقة قانون جديد على قد الحال .. ومهر ربع
جنية .. واجيب انا عفش بيتى على قد فلوسى .. وفرح بسيط مش بهرجة ورقص
ومسخرة .. ده احنا بنبتدى مع بعض علاقة نضيفة .. اجيب كمبيوتر اجيب
تليفزيون .. اجيب تلاجة صغيرة والا كبيرة .. فى الاول والآخر احنا اللى ح
نستعملها .. ولو باظت اكيد انا برضه اللى ح اجيب غيرها مش ح آجى واقولك
هاتلى .. وحضرتك ممكن تاخد رايها على الكلام ده
الاب : انت جاى تشتمنى والا ايه ؟ .. احنا ما عندناش بنات تمشى كلامها على
ابوها .. الظاهر انك جيت البيت ده غلط

حسن : لا ياحج انا طبعا ما جتش غلط .. بس ممكن اكون عايش فى زمن غلط ..
مع ناس مش عايشة فيه .. وبعدين هو مش حضرتك مصرى برضه ..؟ .. يبقى انا ما جتش غلط .. انت اللى قاعد غلط وبتتكلم غلط فى غلط
الاب : احترم نفسك يا ولد
حسن : بلا احترم نفسى بلا نيلة بقى .. احترموا انتوا ظروفنا اللى انتوا
حطتونا فيها .. احترموا انتوا دينكم اللى بتعتقدوه وبتعلموهولنا ..
احترموا انتوا عقولنا بكلامكم اللى مالوش اى علاقة لا بالعقل ولا بالواقع
الاب : اطلع برة .. ده انا عمرى ما ح اجوزهالك حتى ولو على جثتى
حسن : حتى دى كمان غلط .. ولا تمت للحقيقة بصله .. والحدق يفهم .. سلامو
عليكو............ ......... ..
يخرج حسن من منزل احلام .. يسب ويلعن ويضرب الارض بقدميه .. بعد قليل يدق
جرس هاتفه المحمول
حسن : ايوة
احلام : ايه يا حسن اللى انت هببته مع بابا ده
حسن : باباااااااااااا .. انا ماشفتش بابا يا طنط .. انا شفت بياع جوارى
بيبيع جارية فى سوق العبيد .. شفت جزار بيبيع معزة للى يدفع اكتر
احلام : ايه يا حسن الكلام ده انت بتغلط فيه .. طب وانا ذنبى ايه .. انا
مش عايزة فلوس ولا دهب ولا حتى غسالة عادية .. هاتلى طشت ياحسن .. هاتلى
قلة .. مش عايزة غير عشة وانسان احبه ويخاف علية واخاف عليه .. واظن ده
من حقى انا مش مراهقة ولا طفلة .. انا عندى اربعة وعشرين سنة ...يعنى
اقدر اتحمل مسؤلية قرارى .. واختار الانسان اللى ح يعيش معايا حياتى
كلها تحت سقف واحد ... اهىء اهىء اهىء
حسن : خلاص بقى بطلى عياط حقك علية .. معلش انا كمان زعلان من اللى حصل واعصابى مشدودة
احلام : طب وح نعمل ايه دلوقت
حسن : العمل عمل ربنا اللى مايرضيهوش اللى بيحصل ده .. ده حتى حرام
وظلم وافترا
احلام : طب ايه رايك يا حسن .. لو اسم نفسى كده وكده .. وتيجى تنقذنى ونتجوز
حسن : لا اااااااا .. انا فى عرضك .. الا ما الحقش انقذك وتروحى فيها ..
وبعدين كده تبقى روميو وجولييت .. وانا ما ينفعش انهى القصة عليها ..
ستين واحد ح يخش يقولى يا حرامى .. دى نهاية مفقوسة وقديمة حتى اسأل جدو شعيب أتقى اللهبير
احلام : طب ح نعمل ايه يا حسن؟
حسن : العبى فى دماغ ست الكل مامتك وهيا تظبطلنا الموضوع
أحلام : مش عارفة اكلمها ازاى
حسن : طبعا يسمعها كلمتين حلويييين علشان تتشجع
أحلام : ماما ست الكل انتى من حق محكتيليش حكايتك مع بابا اتعرفتوا ازاى
ام أحلام : والله انا قابلتة فى اتوبيس وكان هو الكمسري واخد من فلوس
التذكرة ولما ضحكتلة ادانى الدفتر كله
وبعدين اعرف عليا وجة خطبنى
أحلام : طب يا ماما وهو كان جاهز
أم احلام : ولا كان جاهز ولا كان منيل
اللى فاكراة انه كان محلتوش اللضا
أحلام : طب متخلصيلى الموضوع دة يا ماما
كلمية
دلعية
ظبطى الراجل يا فاطمة يا ست الكل خليكى تخلصوا منى وتستريحوا

أم أحلام:
بس كدة حاضر يا حبيبة ماما انا هقنعه وأما نشوف انا ولا هو
أحلام : خلاااااااااااااااااااااااااااا اااااااااص .......يعنى هتجوز



ملحوظة هامة : المشهد ده انا واخده من فكرة شبيهة ليه من جزء من موضوع تانى شفته فى منتدى تانى فجت فى دماغى فكرة انى أجسدلكوا فكرة الموضوع ده
قلت اجيبه علشان يكون اساس الموضوع اللى هتناقش معاكو فيه

الموضوع هو ياترى ياشباب كل واحد فيكو بيكون عامل حسابه وهو رايح يتقدم للبنت اللى حبها ولا لا
كل واحد بيكون عامل حسابه انه ممكن يترفض ولأسباب تافهة جدا
طيب لو ده حصل واترفضت هيكون رد فعلك ايه هتستسلم من أول جولة ( على اساس انك بتلعب ماتش ملاكمة ) )
ولا هتحاول تثبت لأهل البنت اللى بتحبها انك الشخص المناسب فعلا لبنتهم؟


طيب سؤال تانى ايه يا ترى الأسباب اللى ممكن أهل العروسة يرفضو العريس علشانها ؟


يلا يا شباب قولو رأيكو فى الموضوع
وانتو كمان يابنات عايزة اعرف رأيكو فى الموضوع يعنى لو اى بنوتة جالها عريس واتفرض لاسباب معينة قولوها علشان بس الشباب يستفادو



اتمنى ان فكرة الموضوع تعجبكو ان شاء الله


عايز أعرف رأى كل واحد فيكو



ملحوظة : هذا الموضوع مرشح لجايزة أوسكارعلى مستوى محافظة كفر البطيخ

[/color]

هو لازم يكون فى رحمه من الاباء والامهات بس حقيقى لما اكون ام اكيد حخاف علىبنتى وابقى عايزه اجوزها جوازه كويسه تقدر تعيش بها سعيده ولازم تكون بتحبه بجد عشان تعرف تعيش معاه
وعلى فكره حلوه اووووى الملحوظه الى انت كتباها هههههههههههههههه

حقيقى عندك حق الشغل مفيش والشقق ولعه وغاليه اوووى طبعا انا برحم بالشباب ودلوقتى الشاب الى عايز يتجوز حقيقى لازم يبقى عدى الثلاثين وداخل فى الاربعين عشان يعرف يعمل اسره
انا اعرف واحده اتجوزت واحد والمسافه السنيه بينهم كبيره وكانه فى سن ابوها بس ممكن الفتاه الشاب الى تحبه تشتغل وهو يشتغل ويديروا المنزل بس احنا طالبين من الشباب بالنسبه للجواز شقه شقه بس وبعدين المعيشه ممكن تبقى كويسه
وبعدين الموضوع فى منتهى الروعه والجمال وحقيقى تسلم ايدك